අදත් සිහි කැදවයි සොදුරු විය වහින විට නගරෙට උඩින්

චිචිරි චිරි චිරි ගගා වැටෙනා පුංචි වැහි බිදු සිය ගණන්
එකට එක්වී මිදුලෙ සෑදුණු වතුර වල වෙත දිව ගිහින්
දෙපා පොඩියෙන් මඩ තලා සෙල්ලම් කලා අපි මතකනම්
සොදුරු ජීවිතයක් ගෙවා ඇති බව කිවිය හැක නිසැකයෙන්

නවා හැඩයට හදයි ඔරු කඩදාසි හරි හරියට එදා
යවා තරගෙට දිනුම කොයි ඔරුවටද කියමින් ඉද බලා
ගිලෙන පෙරලෙන පෙගෙන ඔරුවට යලිත් පණ දෙන්නට සිතා
වෙහෙස වුණු සුන්දර ළමා කළ ගෙවුණි අපි කාටත් හොරා

විඩාබර දිවි ගමන සනහන සිසිල් ගැබ්බර වැහි පොදින්
වැටෙන විට වැහි බින්දු එක පිට තෙමෙන්නට හැකි නම් තුටින්
අදත් සිහි කැදවයි සොදුරු විය වහින විට නගරෙට උඩින්
ළමා විය වෙත යන්ට හැකි නම් දමා දුවගෙන එමි සැණින්